Argu-yi, Sɛid At Mɛemmer

Dessin - Oeil fermé - Sonia LOUNIS © Tous droits réservés

 
Argu-yi

Ay ixef-iw mmet neγeṭṭeṣ, iḥulfan d uccanen ibaraγen.
Ay asmi nugi urar s tmess, maca, nettṣuḍu isγaren.
Ass-a ur γ-d-yettali nnefs, nettwaṭṭef deg yiles,
nekcem lḥebs d imγaren !
Wid yekkaten ulawen ttdarin, tiγemmar n yilsawen.
Yettwagerrez am tseddarin, webrid yeskawen ifadden.
Lemmer ileḥsab ur tt-rrin, tagi deg uγerbaz ur tt-γrin,
tayri d ayla n wulawen.
Targit-iw tezga, teqqel d lebda,
anda ruḥeγ ad iyi-taf.
Di sin nhegga, nekcem γer temda,
sakin nerra-tt i wucaf.
D kemm i teğğa, targit is d-yedda
wul mi teqqel d amextaf.
Argu-yi argu-yi
Ttxilem mdel allen
Argu greγ-am iγallen
Argu-yi
Targit akka i tbeddu : S asif mi netteddu,
neṭṭef abrid d takessart.
Zzher deg-s yettmuddu, ula d yemma ad tt-nessedhu,
mi tt-id-nufa ddaw tasaft.
Tenna-k ""a mmi lḥu, ssarameγ-awen zzhu,
faṛṣet yak temẓi tettfat!".
Argu-yi argu-yi
Argu mi d am-tt-id-ssawleγ
Tidi ahat daγen a d-teffeγ
Argu-yi
Tidi-nni azen-itt-id, di tqerεet err-itt-id,
teẓriḍ amek ara s-xedmeγ !
Neγfell-i nγel-itt-id, aql-ih ssureg-itt-id,
d lğennet ideg ara cucfeγ.
Tiselbi-w wali-tt-id, ma triḍ rgem-itt-id,
ur cqiγ di kra selbeγ.
Argu-yi argu-yi
Freγ-kem deg iciwi-w berra
Γilen sεiγ sin iqerra
Argu-yi
Tameddurt tewεer, akken tezmer i lεar,
i tḥemmel timuffirin.
Igenni ad kem-yeṣṣer, xerṣum kemm ulayγer,
aṭṭan n tgeẓẓal neγturin.
Lemmer ad iqedder, ur teḥwağeḍ aḥebber,
teẓriḍ γas medden ur ẓrin.
Argu-yi argu-yi
Amejjay ma yessaged-ikem ass-a
Ad am-fkeγ ula d ul d tasa
Argu-yi
Ẓriγ ad tt-sfiqeγ, d acu sserwateγ,
s tiselbi-w d acu ad txedmeḍ ?
Ur sserwateγ, nniγ-d kan ḥemmleγ,
ur d am-nniγ ad iyi-tḥemmleḍ.
Yerna ur uklaleγ, ad ttuḥemmleγ,
llan widak tḥemmleḍ.
Argu-yi argu-yi
Argu-yi kan d targit
Atta tewweḍ-d tmeddit
Argu-yi
Teffγeḍ ad txedmeḍ, teεyiḍ mi d-tuγaleḍ,
tura i d-tberneḍ s axxam.
Ad aγ-d-tafeḍ, nekk d isefra ntenneḍ,
ntezzi γef ccbaḥa-m.
Tzemreḍ ad tεeggḍeḍ, fell-i ad d-tğellbeḍ,
ad kem-yeffeγ yir ttexmam.
Argu-yi argu-yi
Argu temmleḍ si trumit
Tira-w d tiẓgi n teqbaylit
Argu-yi
Ṛẓiγ aqerru, zzegreγ-d asefru,
kemm teẓriḍ d acu tebγiḍ.
Iẓri-w la yettru, maca, ur tferru,
ccah nenṭer ur nettγiḍ.
Ddunit d aγurru, iwumi asefru,
d-yulsen kan ayen teẓriḍ ?
Argu-yi argu-yi
Zdat-m sfuḥayeγ lqecc-im
Γas aya ẓrant-t wallen-im
Argu-yi
Tasekreft-nni, teqqaṛṣ ussan-nni,
imiren yebḍa wul-iw.
Afus deg-s yesni, amek akk akkenni,
almi tt-icudd ufus-iw.
Ttḥareγ iḍ a d-yeγli, d lawan-nni
ideg teqqneγ acebbub-iw.
Argu-yi argu-yi
Γur-m ad tγileḍ ttuγ amru
Yes-s i d-yettwaru usefru
Argu-yi
Dayen tura ad kem-ğğeγ, ẓriγ daya i terğiḍ,
Ur kem-yettağğa wul-iw.
Yiwen wass ad d-feğğeγ, anda d iyi-teğğiḍ,
wissen ma ad d-yegri later-iw.
Ayen akk ad d-ğğeγ d kemm deg-i teğğiḍ,
ad teγren di tmedyazt-iw.
Argu-yi argu-yi
Ma tayeḍ iḥemmel-itt wergaz
Kemm tesselbeḍ amedyaz
Argu-yi
Γas akken ttujegḥeγ, acemma ur t-xṣiṛeγ,
deg waya kemm ma trebḥeḍ.
Dayen tura ad ruḥeγ, dayen ur d-qqareγ,
D amezzir ma ulac ad d-teddmeḍ.
Tidet ur m-tt-tefreγ, γas akken weεreγ,
kemm bγiγ ad iyi-tewwteḍ.
Argu-yi argu-yi
Argu terwi tudert-iw
Maca, yessuref-am wul-iw
Argu-yi
Aya ad am-t-id-rnuγ, mačči d amennuγ,
ddnub awer d iyi-iqis !
Ssneγ kan ad ssefruγ, tili ad am-t-id-cnuγ,
s uẓawan-nni n Lewnis.
Ad cennuγ ad ttruγ yerna ad ttuγuγ,
Rebbi ad ssummleγ Rebbi-s.
Arğu-yi arğu-yiiiii
Deg igenni-w εelqen-iyi isem-im
Arğu-yi a ddin qessam-im
Arğu-yi